Nuwe enkelsnit/musiekvideo uit van Chanell van den Bergh

Ná die suksesvolle uitreiking van Chanell van den Bergh se enkelsnit, Twee Tree, is die blondekop sangeres terug met ’n nuwe enkelsnit, wat Oorlog heet.

Oorlog, wat deur Chanell self geskryf is, is ’n pop/country/rock liedjie wat handel oor ’n innerlike geveg wat uiteindelik tot die einde van ’n verhouding kan lei. “Ek het Oorlog al ’n jaar terug geskryf, en ek voel musiek moet ’n mens ’n gevoel kan gee en mense deur moeilike tye dra,” sê sy.

Chanell hoop dat haar gehoor met die liedjie kan vereenselwig, en sê: “Ek dink ons almal was al in so ’n verhouding waar jy baklei teen liefde.” Volgens die sangeres het musiek haar altyd deur moeilike tye gedra, en sy hoop dat haar musiek iemand anders weer deur soortgelyke tye kan dra.

Die musiekvideo vir die snit is ook deur Chanell self finansier. “Ons het geen begroting gehad, maar ek was super blessed deur ongelooflike vriende te kan hê, wat kamera toerusting gehad het wat bereid was om te help. Hulle is baie talentvolle artistic mense.” Die video is in Pretoria en Melville geskiet, en deur LAS Productions vervaardig. Dit fokus op die goeie in plaas van die slegte in ’n verhouding.

Chanell sing reeds van kleins af, en het op skool gereeld deelgeneem aan kultuur-aktiwiteite. Sy het op skool nasionale goud gewen nadat sy ’n liedjie vir ’n sangkompetisie geskryf het. Sy was ook hoofmeisie van Curro College en beskryf haarself as ’n sagte mens. “Ek is lief vir honde. My gunsteling deel is as ek van die werk afkom en liedjies kan skryf,” vertel sy.

Alhoewel sy nog ’n groentjie in die musiekbedryf is, staan haar rolle in flieks soos As Jy Sing, Trouvoete en Mignon “Mossie” van Wyk vir haar uit. Een van haar grootste loopbaan hoogtepunte is toe sy in 2014 saam met As Jy Sing-geselskap tydens Afrikaans is Groot opgetree het.

Plaaslike kunstenaars soos Theuns Jordaan en Elandré Schwartz inspireer haar en sy skryf oor dinge wat haar raak. Wanneer sy egter nie kon sing nie, sou sy graag ’n CA wou wees aangesien sy goed is met syfers. Internasionaal is dit veral Miranda Lambert, Brad Paisley en Carrie Underwood wat haar inspireer. “Ek is Nashville mal. Country musiek het altyd ’n storie met regte gevoelens en regte mense agter ’n liedjie,” vertel sy.

Chanell se gunsteling musiek-aanhaling is: “musiek voed die siel”, en sy meen dat die een ding wat niemand van haar weet, is dat sy twee linker hande het. “Ek kan geen sport doen om my lewe te red nie, ek was so swak dat mense my gevra het om die netbal span te verlaat op skool. As jy wil lag vra my om ’n tennis bal te gooi,” skerts sy.

Vra jy haar wat die musiekbedryf haar tot dusver geleer het, antwoord sy graag: “Om nooit te verander vir ander nie. Volg jou passie, moet nooit opgee nie en daar is ’n plekkie in die son vir almal.”

En die grootste uitdaging wat sy moes oorkom? “Sjoe, om nie op te gee op my passie nie. Om harder te werk om dit hopenlik voltyds te kan doen binnekort,” antwoord sy.

Chanell sit ook glad nie stil nie. Sy is reeds klaar met haar volgende enkelsnit, Trek My Nader, en is druk besig om haar debuut album te voltooi. Verder is daar ook heelwat optredes in die pyplyn. “Om jou aanhangers persoonlik te ontmoet is iets anders. Ek kan dit regtig nie in woorde beskryf nie, en dis vir my die heel beste van my loopbaan,” sluit sy af!

Loer hier on der na haar nuwe treffer:- Chanell van den Bergh – Oorlog

Enjoyed this post? Share it!

 

Leave a comment